AGOSTO 24 CASTELO SON

CULLEREDO VENRES 24 DE AGOSTO

- O humorista e presentador Xosé A. Touriñán, o veciño máis ilustre de Castelo, será o padriño e pregoeiro do festival co que arrincan as festas da súa terra natal
- Carlos Blanco e Budiño DJ presentan xuntos iLalelo!, un espectáculo de humor e música
- Despois do exitoso regreso de Heredeiros da Crus, Tucho retoma o seu grupo de versións
- A carralesa Orquestra Aconfónica coa súa ‘filloeira’, a Familia Caamagno desde Sigüeiro, a banda de pop-rock Los22 e París DJ para pechar a noite completan o cartel do Castelo Son
- O festival, que este ano cambia de nome para celebrar a súa cuarta edición, está organizado pola Asociación Castelo Deporte
- A entrada é gratuíta. Haberá zona de acampada libre, aparcadoiro e bar. Toda a información, na web www.casteloson.com
  
Culleredo, 15 de agosto de 2012
A parroquia cullerdense de Castelo prepárase para recibir este venres a unha boa selección do mellor humor e a mellor música feita en Galicia: Xosé Antonio Touriñán, Carlos Blanco e Xosé Manuel Budiño, Recambios Tucho, Familia Caamagno, a Orquestra Aconfónica, Los22 e París DJ.
Será na cuarta edición do Castelo Son, un festival rebautizado (até agora chamábase Castelo Music Festival) pero que mantén o seu espírito intacto: unha noite de música e humor gratuítos nun entorno natural inmellorable –aos pés do monte Xalo- e botado adiante grazas ao esforzo e a ilusión dos mozos da Asociación Castelo Deporte, unha das entidades máis activas e innovadoras da comarca das Mariñas. 
O espectáculo do Castelo Son comezará contra as oito da tarde deste venres da man de Xosé A. Touriñán, o veciño máis ilustre de Castelo, que exercerá de padriño do evento cun pregón que abrirá as festas que durarán toda a fin de semana (o sábado e o domingo haberá verbena). Touriñán –ou ‘Touri’, como se lle coñece na que é a súa terra natal- leva varias semanas colaborando cos organizadores do festival, até o punto de protagonizar un simpático vídeo titulado ‘Isto é Castelo’ no que dá conta de toda a programación. http://youtu.be/VlERhsQ4JXo
Despois do esperado pregón de Xosé A. Touriñán, chegará o turno doutras dúas estrelas da cultura galega: o actor e humorista Carlos Blanco e o gaitiero Xosé Manuel Budiño presentarán iLalelo!, o espectáculo conxunto co que levan meses xirando por Galicia e parte do estranxeiro e no que mesturan o mellor humor de Blanco coa mellor música de Budiño, que ademais de interpretar algunha peza en directo exerce de DJ.
Logo de iLalelo!, comezará a música ininterrumpida no Castelo Son: comezando por Los22, a banda de pop-rock da Coruña que está a presentar o seu primeiro disco, ‘Escena Final’. A continuación actuará unha orquestra moi especial, a Orquestra Aconfónica de Carral, con letras festeiras e reivindicativas e co seu ‘jit’ A filloeira como bandeira. Chegará despois un dos concertos máis esperados da noite: o de Recambios Tucho, o grupo de versións jamberras de Tucho, o guitarrista de Heredeiros da Crus que retoma así este proxecto logo do exitoso regreso dos Heredeiros. Por último, chegados desde Sigüeiro pecharán a rolda de concertos Familia Caamagno, a banda galega máis parecida aos míticos Blues Brothers.
Para poñer á guinda á noite, París DJ., o que fora pincha da extinta Sala The Star de Carral (un dos locais de espectáculos de máis sona en toda a comarca), ofrecerá unha ampla sesión da música máis actual para os que queiran prolongar a festa ata altas horas da madrugada.
Entrada e acampada gratuíta
O Castelo Son celebrarase na polideportiva de Castelo, un espazo cuberto pero ao aire libre ao pé do monte Xalo, que contará para a ocasión cun amplo espazo de backstage, unha zona VIP, ademáis dunha extensa explanada destinada á acampada para quen prefira pasar a noite na parroquia cullerdense. Un escenario de case doce metros e máis de 15.000 watios converten este festival nunha das citas imprescindibles no verán en Culleredo.
Porén, e ao correr a organización a cargo dunha asociación sen ánimo de lucro, sendo ademáis un festival completamente gratuíto e aberto a todos os veciños do concello, Castelo Deporte agarda o apoio das concellerías de Cultura, Participación Cidadá e Xuventude de Culleredo para que o evento poida desenvolverse co maior dos éxitos e medrar de cara a edicións posteriores.