A VIAXE DE YOYOEste disco narra, a través das súas cancións, a apaixonante viaxe de Yoyo, un rato afable e soñador que un bo día decide abandonar a seguridade da súa tobeira na procura de aventuras, co desexo de descubrir lugares distintos e facer novos amigos.
Así, coñecerá a Tutú en Brasil, viaxará por Europa do Leste, baixará ás profundidades do océano, cantará á lúa chea en África, visitará os xardíns máis fermosos, asistirá a un baile de máscaras e vivirá mil e un paripés ata rematar nun deserto imaxinario onde descubrirá que a maior viaxe está no seu ollar das cousas, de si mesmo e dos demais.
O deseño e de Olalla Fernandez http://olallafernandez.com/Disco-A-Viaxe-de-Yoyo-DOUS
No ano 2017 DOUS presenta A viaxe de Yoyo, o seu terceiro traballo discográfico editado baixo o selo galego Nakra e no que continúan na liña marcada nos seus traballos anteriores, mesturando influencias de músicas do mundo e improvisación para crear un repertorio de composicións propias que afondan na procura da emoción por riba do virtuosismo técnico,
convidando ao ouvinte a unha viaxe a través dos sentidos.
DOUS nace alá polo ano 2001 cando Fernando Abreu e Pablo Carrera se coñecen durante a gravación do primeiro disco de Mercedes Peón. A partires daquel encontro realizan sesións de improvisación que deixan gravadas e que servirán tempo despois como base das composicións recollidas no seu primeiro traballo, sÓ sOn sOns (Falcatruada, 2008). No ano 2012 publican DOUS (Nakra), un conxunto de pezas onde a melodía e as músicas populares do mundo sitúanse na base da súa creación.
DOUS ten sido finalista dos Premios Martín Codax da Música Galega en tres edicións dentro da categoría de Músicas do Mundo.
DOUS, PARIPÉ
https://vimeopro.com/user1971386/dous/video/211495512
Fernando Abreu nos clarinetes e Pablo Carrera nas guitarras e a voz son dúas personalidades diferentes, dúas bagaxes vitais coas súas influencias sonoras que se unen para crear un todo chamado DOUS.
FERNANDO ABREU é titulado superior en Clarinete polo RCSM Madrid. Os seus intereses
musicais lévano a especializarse en interpretación de Clarinetes Históricos polo Koninklijk Conservatorium da Haia (Holanda). Especializado en Música Tradicional Galega pola USC, contínua a súa formación cun DEA en Etnomusicoloxía pola Universidad de Valladolid.
No terreo profesional foi membro do Ensemble de Música Contemporánea do Centro Galego de Arte contemporánea e da O.M.E.GA. (Orquestra de Música Espontánea de Galicia). Así mesmo, é colaborador habitual en directo e en estudio de Mercedes Peón e convidado en gravacións e concertos dunha gran cantidade de artistas galegos, entre os que se atopan Pablo Novoa, Ecléctica Ensemble, Xardín Desordenado, Doctor Harapos, Sete Saias, Malvela ou Om-Off.
Na actualidade é membro do Cuarteto Caramuxo e da Banda Crebinsky e exerce como mestre de música no IES Salvaterra de Miño.
PABLO CARRERA é guitarrista, compositor, produtor e músico experimentador, amante do son, habituado a crear texturas sonoras e resonancias emocionais, adicto á improvisación e capaz de moverse en diversos estilos musicais dende as músicas étnicas e o blues ata as vangardas sonoras contemporáneas.
Foi creador, xunto a Víctor Lorenzo, do grupo Doctor Harapos co que editou o disco Historias de Psiquiátrico no ano 2005.
Na actualidade tamén é membro da Banda Crebinsky e de Leopol, dúo de improvisación xunto ao batería Leandro Deltell. Ademais, como artista en solitario, Pablo Carrera interpreta temas clásicos de blues, o que lle valeu unha nominación como finalista dos Premios Martín Codax da Música Galega na sua 3ª edición na categoría de Blues, Funk e Soul.
DISCOGRAFIA PREVIA:
"nOn sOn sÓ sOns" foi un disco só de descarga dixital que publicamos en Alg_a.org ao tempo do noso primeiro disco con gravacións de corte mais contemporáneo e experimental.
So son dous
ONDE ATOPARNOS
www.sondous.com
dous@sondous.com
___
Management/Contratación:
Patricia Verdial
609 759 616
patricia.verdial@gmail.com
