Creamos un evento no facebook onde animamos á xente a través dun concurso a enviar calquera proposta cun debuxo, unha foto, un vídeo ou como máis cómodo lles resultara enviarnos as súas ideas a través da nosa páxina no facebook, no mesmo evento, ou por correo electrónico a sachanahorta@gmail.com. Haberá un pequeno premio como agradecemento e, quen sabe? se cadra lanzamos a carreira como deseñador/a de alguén a partir de lucir os seus deseños en semellantes persoeiros da agropunkchanga nacional...
Moitas persoas manifestaron a súa morriña polos nosos entrañables mandís. E xa explicamos que non se trata necesariamente de abandonalos. Nós tamén os sentimos xa como unha segunda pel. A intención é máis ben revisar a nosa imaxe e renovala dalgún xeito. Ata o de agora non houbo moitas propostas, pero algunhas apuntaban moi boas ideas definindo máis a imaxe da sachadora a través de complementos e símbolos moi interesantes.
Esta semana anunciaremos o premio e pecharase a recepción de ideas o un de febreiro, cando comezaremos a deliberación na horta para escoller a que máis nos guste e unha semana máis tarde publicaremos @ gañador@ e a partir de aí teremos a máquina de coser a botar fume para estar a punto para a nova tempada de primavera-verán hortícola, para a que temos pensado suar a base de ben o novo atavío porque imos quentes e con moita necesidade de unirnos ás moitas voces que berran e din nas rúas estes días e sobre todo de armala.
Así que dende aquí animamos a tod@s as mentes inquedas a soltar algunha chispa de creatividade para esta banda repoluda, sa e anticanceríxena que é Sacha na Horta.
