Xa está á venda o dobre disco “Elelelos: Músicasde tradición oral no Concello de Bueu”
Presentarase oficialmente cun concerto homenaxe en Bueu
o venres 27 de xuño
O proxecto logrou case 4 mil euros de mecenas a través de Internet
A presentación en público dos Elelelos será o venres 27 de xuño, cun concerto de balde no Centro Social do Mar de Bueu (ás 20.00h). Nesa ocasión, actuarán os músicos de Retrouso que participaron no disco (7 pandeireteiras, 2 gaiteiros, un acordeonista, un tamborileiro e un bombeiro), contando coa colaboración doutros compañeiros e compañeiras das escolas de Retrouso. Intervirán tamén algúns dos informantes que aparecen no primeiro dos cedés que compoñen o Elelelos, veciños e veciñas do Concello que souberon manter a cadea da tradición oral ata os nosos días.
O CD, pola súa banda, “está á venda a través da web elelelos.com”, informou Guillerme Ignacio, “en distintos puntos de Bueu como a libraría Miranda, a libraría Abrente, o bar Aturuxo ou O Couto de Beluso; e vai ser distribuído por toda Galicia e por puntos importantes do estado a través da distribuidora Inquedanzas. Ademais de poder pedilo directamente a través da asociación”.
O proxecto Elelelos contén dous discos.
O primeiro é unha escolma das recollidas de campo que os membros de Retrouso de Cela levan facendo a xente maior durante os últimos 15 anos en todos os recunchos de Bueu. Inclúe música de gaita, filharmónica, pandeireta e sobre todo moita música vocal. Cantares do ciclo da vida (arrolos, xogos) e do ano (reis, panxoliñas, cantares do entroido); un enorme repertorio de cantares e tocatas para o baile... Unha compilación que chega aos 47 cortes e que pretende achegar ao puúblico en xeral e aos estudosos en particular a achegarse ás músicas de raíz deste pequeno pero interesante concello morracense.
O segundo disco é un tributo de Retrouso tanto ás músicas do concello de Bueu coma aos seus portadores, os nosos informantes. Nel hai 14 pezas tradicionais reinterpretadas por músicos da agrupación de Cela, e conta tamén coa participación especial de María do Caño, grande cantadeira da Illa de Ons que interpreta un antigo romance acompañada da zanfona de Guillerme Ignacio.
Recadación vía crowdfunding
O proxecto Elelelos deuse a coñecer a finais do ano pasado, ao lograr financiarse mediante un innovador sistema de micromecenado (crowdfunding) a través de Internet. Cun obxectivo de financiamento de 3.600€, logrou reunir finalmente case 4.000 euros, de algo máis de 200 mecenas, na súa inmensa maioría a través da plataforma Verkami. Os mecenas axudaban a garantir a realización da iniciativa a cambio de recompensas previstas como un adianto en mp3 dalgunhas cancións, unha camisola de Elelelos deseñada por Luís Davila ou unha copia do traballo, cando estivese listo.
Os envíos para os mecenas máis afastados xa se realizaron e o día 27 Retrouso agarda entregar os que quedan aos máis próximos. A presentación oficial servirá tamén para agradecer e homenaxear a estes mecenas que permitiron a realización da iniciativa.
Datos sobre o micromecenado de Elelelos
Procedencia
Dos arredor de 200 mecenas que apoiaron o proxecto antes da súa saída, case o 40% eran de Bueu e outro 30% de vilas do resto da provincia de Pontevedra (sobre todo Cangas, Moaña, Vigo e Pontevedra). O interesante foi ver que un 15% das achegas viñeron da provincia da Coruña, outro 5% entre Ourense e Lugo, e un 9% chegaron desde fóra de Galicia, mesmo algunha de Portugal, Bélxica, Alemaña ou Reino Unido.
Xénero
Como curiosidade: o 52% dos mecenas foron mulleres. Un 42% foron homes e o 6% restante foron institucións: xente que mercou en nome de asociación culturais, colexios ou empresas.
Contía das achegas
A media de achega de cada mecenas roldou os 20€, sendo o pack máis escollido, nun 40%, o que xuntaba o CD e a camisola de Luís Davila, quen colaborou altruistamente no proxecto. Seguido, co 29% o pack de 25€ (CD e dúas camisolas) e en terceiro posto o de 12€, co 24%, que daba dereito ao envío do dobre CD. Houbo tres mecenas que achegaron 100€ cada un.
Sobre Retrouso de CelaA Asociación Cultural Retrouso de Cela leva máis de 15 anos traballando pola recuperación e impulso da cultura tradicional galega e nomeadamente a música e o baile tradicionais. Ten unha forte estrutura de escolas de baile, gaita, percusión, canto e pandeireta e acordeón, ademais de organizar recollidas de campo, foliadas e festivais musicais.
Para máis información: 657 209 731 (Guillerme Ignacio).
Asociación Cultural Retrouso de Cela
www.facebook.com/retrouso
