O xornalista Xosé Miguel Alonso Boó cumpre unha promesa feita en vida ó seu amigo Suso Vaamonde, quen anos antes de morrer encargoulle ao seu amigo a realización, –“cando chegue o día”, díxolle– das súas memorias. Para tal fin entregoulle os seus arquivos persoais.
Por razóns de carácter emocional e o medo a defraudar “a uns e outros” adiouse no tempo a elaboración dun traballo que agora ve a luz co título “Suso Vaamonde, voz de Trebón”e que ten por subtítulo "O músico rebelde que popularizou a poesía galega", onde Miguel Boó repasa a vida e obra musical deste cantautor nado en Ponte Caldelas no ano 1950 e que finou en Vigo no 2000.
Como explica o seu irman Senén Vaamonde, "Suso converteu en cancións os poemas de 76 poetas, ata o punto de que moitas xoias como “O Cuco”, de Manuel María, é posible que nin sequera fosen coñecidas de non ser polo labor de divulgación desta persoa sensible e namorada da súa terra".
Tal e como salienta o xornalista, Suso Vaamonde foi ademais “un rebelde, un home moi comprometido coa lingua, co seu pobo, e como sempre fixo esto desde a independencia, sen pertencer a ningún partido político, acaboulle pasando factura, porque cando chegaron os momentos malos da súa vida, a partir de 1979 cando foi xulgado e condeado a seis anos de cadea, practicamente todos o abandonaron, non houbo movementos de solidariedade con el”, relata.
A obra recolle tamén, entre outras moitas cuestións e curiosidades, a relación de Vaamonde co colectivo “Voces Ceibes” que se foi deteriorando ata converterse nunha “xenreira insalvable”.
A obra está editada por Galicia en el Mundo.
https://www.todostuslibros.com/libros/suso-vaamonde-voz-de-trebon_978-84-09-08818-8
Fontes:
Diario de Ferrol https://www.diariodeferrol.com/articulo/ferrol/miguel-boo-suso-vaamonde-foi-musico-rebelde-popularizou-poesia-galega/20190221205054248923.html
El Correo Gallego https://www.elcorreogallego.es/tendencias/ecg/suso-vaamonde-voz-trebon-gana-eco-ourense/idEdicion-2019-02-19/idNoticia-1166952
El Diario.es https://www.eldiario.es/galicia/Suso-Vaamonde-exiliado-canciones-Valtonyc_0_775173333.html
facebbok Alcalde de Ponte Caldelas Andrés Díaz
