SAE Á LUZ
'NON TEMOS MEDO. HISTORIA ORAL DE OS DIPLOMÁTICOS DE MONTE ALTO', A
PRIMERA BIOGRAFÍA QUE SE PUBLICA DUNHA BANDA DE ROCK EN GALEGO
O
xornalista Rodri Suárez é o autor do libro, co selo de Nicetrip
Edición e xa á venta, que se presentará ao público o próximo
mércores 28 de maio, na Sala Mardi Grass da Coruña. Usando decenas
de testemuñas, o texto relata a carreira da banda de rock “que
tronzou todos os tópicos submisos para liderar un movemento, o
Bravú, que supuxo un inédito estoupido popular e galego”.
En coincidencia co inicio dos actos que
conmemorarán o XX aniversario da creación do chamado “rock bravú”
sae á luz 'Non Temos Medo. Historia Oral de Os Diplomáticos de
Monte Alto', a primeira biografía que se publica dunha banda de rock
en galego, tamén a primeira dun grupo de rock da cidade da Coruña.
Escrita polo xornalista Rodri Suárez (A Coruña, 1974), o volume fai
un repaso -mediante os relatos en primeira persoa dos seus
protagonistas- á carreira dunha banda que supuxo unha revolución no
panorama do rock galego, segundo o autor “cunha marabillosa obra
pero sempre coa vocación de ir máis alá da música, de converterse
nunha axitación xeral coa que crear modernidade partindo da
reivindicación da cultura popular. Asi, tronzaron todos os tópicos
submisos e acomplexados para liderar un inédito estoupido como foi o
Bravú”.
“Os Diplomáticos xurdiron comoi
reacción ao elitismo, utilizaron a linguaxe a a música do seu tempo
para ofrecer unha cosmovisión propia, que rachara con falsas
dicotomías sobre o urbano e o rural, que puxese en valor a lingua
galega como vehículo para o rock e que tamén fixara o foco en
realidades agochadas, como a vida nos barrios, para así combater as
tendencias -que definiron como provincianas- que se limitaban a
copiar a creatividade que xurdía noutras latitudes”, explica o
autor, que destaca o éxito que obtivo esa proposta: “Venderon
milleiros de discos; xuntaron multitudes nos seus concertos, por toda
Galiza pero tamén fóra, por exemplo en Euskadi, onde foron ídolos
de masas; crearon unha linguaxe e mesmo un estilo de rock totalmente
recoñecible e de enorme calidade e, o que resulta aínda máis
importante, a influencia da súa obra alcanzou territorios como o da
televisión (casos moi populares foron os do Club Xabarín ou Mareas
Vivas), as artes ou a literatura, onde escritores de renome como
Manuel Rivas recoñecen a súa cercanía ao Bravú”.
Precisamente Rivas é unha das case
trinta persoas que prestan a súa voz ao libro -que utiliza a técnica
narrativa oral, a base de conversas- xunto a artistas que mantiveron
unha estreita relación con Os Diplomáticos -Antón Reixa, Xosé
Manuel Pereiro, Mercedes Peón ou Manu Chao- ademais dos propios
membros da banda, como Xurxo Souto, Rómulo Sanjurjo ou Marcos
'Pulpiño' Viascón. “A xenerosidade, tanto cun público ao que
sempre convidaron a participar mediante actos diversos na rúa como
cos artistas referenciais do seu tempo ou anteriores -como Os
Resentidos, Radio Océano ou grupos que xurdiron no seu ronsel, caso
de Rastreros ou Papaqueixos- é outra das características máis
definidas da banda coruñesa”, indica o autor.
“O libro está centrado no musical
porque o rock en galego ten que ter presenza nas librarías, e máis
agora que se vive unha época dourada da literatura sobre rock, pero
ao mesmo tempo o texto tamén presta gran atención a cuestións
vitais e sociais, mesmo políticas, porque falar de Os Diplomáticos
é facelo así mesmo da vida nos barrios, da presenza do galego nas
cidades, da relación destas coas aldeas de onde a enorme maioría
vimos, da repercusión no noso territorio de escenas como o punk -do
que saíu o chamado movemento atlantista dos 80- pero tamén das
orquestras clásicas, da reivindicación creativa que acompañou ás
protestas de Nunca Máis ou do futuro do galego como lingua viva a
todos os niveis, tamén no rock'n'roll”, afirma Rodri Suárez, que
ademais remarca que “en todo caso, o efecto expansivo que xerou a
banda de Monte Alto non debería eclipsar o talento maiúsculo que se
amosa nas cancións dos seus cinco discos, tan poderosos como o seu
discurso, con éxitos incontestables que xa forman parte da tradición
do rock galego: 'Non Chas Quero', 'Gaiteiro', 'Fura Futbolín'...”.
O libro, que sae baixo o selo de
Nicetrip Edición, xa está na rúa, en tendas como a propia de
Nicetrip ou a FNAC da Coruña e está chegando xa a librarías de
toda Galicia. Será presentado ao público o mércores 28 de maio ás
20:30, na Sala Mardi Grass da cidade herculina, no propio barrio de
Monte Alto.
Trátase do primeiro libro do
xornalista Rodri Suárez, que ten traballado en periódicos como La
Opinión -onde foi Xefe de Deportes- ou Xornal de Galicia -onde
coordinou a información política- e tamén exerceu de guionista de
humor para a TVG ou colabora na actualidade con distintos medios,
como Luzes ou, de forma fixa, Sermos Galiza. Así mesmo, escribiu a
letra dunha peza dos propios Diplomáticos ('Lume de Biqueira') e
mantivo unha sección nun dos programas de radio do líder da banda,
Xurxo Souto, o local 'A Tropa da Tralla' de Radio Coruña-Cadena Ser.
Contacto co autor:
(Rodri Suárez. Tlf: 698189601. E-Mail: rodrisuarez@mundo-r.com)
